नास्ति नारायण समं - न भूतं न भविष्यति
Partial Solar Eclipse
PARTIAL SOLAR ECLIPSE 21.06.2020
చూడామణి నామక రాహుగ్రస్త ఖండగ్రాస సూర్య గ్రహణము (Partial Solar Eclipse):
అస్మిన్ వర్షే జ్యేష్ఠ బ అమావాస్య భాను వాసరే 21.06.2020 మృగశిర నక్షత్రే, సింహ లగ్నే, మిథున రాశ్యాం సూర్యోదయాది ఘటికా ౧౧-౩౭ వి, సమయే ఉదయం 10-18 ని. చూడామణి నామక రాహుగ్రస్త ఖండగ్రాస సూర్య గ్రహణం (ఈ సూర్య గ్రహణం ఉత్తర, మధ్య భారత దేశం అంతటా స్పష్టంగా కనిపిస్తుంది. దక్షిణ భారతదేశంలో పాక్షికంగా కనిపిస్తుంది. ఆసియా ఖండంలో దాదాపుగా అన్నిచోట్లా, తూర్పు/దక్షిణ ఐరోపా, ఉత్తర ఆస్ట్రేలియా, ఆఫ్రికాలో దాదాపు అన్ని ప్రాంతాలు, పసిఫిక్ మరియు హిందూ మహాసముద్రం లో కనిపిస్తుంది. ఈ ప్రాంతాలలో జీవించు వారందరికీ గ్రహణ పట్టింపు కలదు. అమెరికా, కెనడా ఇత్యాది ప్రాంతాలలో ఇది కనబడదు. కావున వీరికి గ్రహణ పట్టింపు లేదు) :
గ్రహణ స్పర్శ ఉ 10-18
మధ్య ప 12-00
మోక్షం ప 13-48
ఆద్యన్త పుణ్యకాలం గం 03-30 ని
గ్రహణ శాంతి:
ఈ గ్రహణము మృగశిర నక్షత్ర జాతకులకు, వృషభ, మిథున మరియు వృశ్చిక రాశి వారికి ప్రతికూలము. వీరు గ్రహణ శాంతి చేసుకోవాలి.
గ్రహణ దానము:
రాగి పాత్రలో ఆవుపాలు పోసి వెండితో చేసిన సూర్య, చంద్ర మరియు సర్ప బింబాలను అందులో వేసి సంకల్ప యుక్తముగా దానం చేయునది.
గ్రహణ సంకల్పం:
‘మమ జన్మరాశి, జన్మ నక్షత్ర,అరిష్ట స్థాన స్థిత గ్రహణ సూచిత సర్వారిష్ట ప్రశాంతి పూర్వక,ఏకాదశ స్థాన స్థిత గ్రహణ సూచిత శుభ ఫలప్రాప్యార్థం బింబ దానం కరిష్యే’
గ్రస్యమానే భవేత్స్నానం, గ్రస్తే హోమార్కచంద్ర కే ।
మండలేముచ్యమానేతు దానం ముక్తౌతు మజ్జనమ్ ।।
గ్రహణము పట్టు సమయమున స్నానము, గ్రహము పూర్ణముగా పట్టిన పిదప జప హోమాదులును, విడుపున దానమును, గ్రహణ మొక్షానంతరము తిరిగి స్నానమును, చన్ద్ర సూర్య గ్రహణము లందు ఆచరించ వలయును.
సర్వం గంగా సమం తోయం సర్వే వ్యాస సమా ద్విజా ।
సర్వం భూమి సమం దానం, తద్దానం మేరు సన్నిభం ।।
గ్రహణ సమయమున వాపి, కూప తటాకము లందలి జలమంతయు గంగా జలముతో సమానమగును. బ్రాహ్మణులందరూ వ్యాస ముని సమానితులగుదురు. ఏ చిన్న దానమైన భూదాన సమానమైన ఫలితాన్ని ఇస్తుంది. అట్టి కాలమున జానులు చేసుకునే ఏ చిన్న దానమైనను మేరు పర్వతమంత ఉన్నతమైన ఫలమును ప్రసాదించును – అని పెద్దలు చెప్పుకొని యున్నారు. కావున గ్రహణ సమయమున మనుజులు యథావిధిగా స్నాన జప హోమ దానాదులను ఆచరించుట అత్యంత పుణ్య ప్రదము మరియు ఆరోగ్య కరము, శుభ ప్రదము అగును.
గ్రహణ ఫల విశ్లేషణ:
నిజానికి ఈ సంవత్సరంలో మనకు ఒకే గ్రహణం కనిపిస్తుంది. అదే పైన తెలుపబడిన చూడామణి నామక రాహుగ్రస్త ఖండగ్రాస సూర్య గ్రహణం. కాని ఈ గ్రహణానికి 15 రోజుల ముందు అనగా 05.06.2020, జ్యేష్ఠ పౌర్ణమి నాడు పెనమ్బ్రల్ అనగా ఛాయాబింబ చన్ద్ర గ్రహణం సంభవించ నున్నది. ఈ ఛాయాబింబ చన్ద్ర గ్రహణమును గ్రహణముగా పరిగణించము. ఎందుకంటే ఇది సామాన్యుడి కంటికి కనబడునది కాదు. భూమి ఛాయ యొక్క బాహ్య వలయం నుండి చన్ద్రుడు సంచరిస్తాడు. దీన్ని నిజానికి మన హిందూ ధర్మ శాస్త్రాలు మరియు జ్యోతిష గ్రంథాలు గ్రహణం గా పరిగణించవు. అదే విధంగా పైన తెలుపబడిన సూర్య గ్రహణం తరువాత 15 రోజులకు అనగా 04/05.07.2020, ఆషాఢ పౌర్ణమి నాడు కూడా ఛాయాబింబ చన్ద్ర గ్రహణం సంభవిస్తున్నది. ఇట్టి గ్రహణ యోగాలు దేశారిష్ట యోగాలను సూచించు చున్నది. ‘ఛాయాబింబ చన్ద్ర గ్రహణ’ అనగా 05.06.2020 మరియు 04/05.07.2020 నాడు సంభవించు ‘ఛాయాబింబ చన్ద్ర గ్రహణాల’ ప్రభావం వ్యక్తిగత రాశుల వారిపై ఉండదు. కావున ఇట్టి గ్రహణాలను పరిగణలోకి తీసుకోవాల్సిన అవసరం లేదు. వీటి ప్రభావం దేశకాల పరిస్థితులపై మాత్రమే ఉంటుంది, కాని వ్యక్తిగత రాశుల వారికి కాదు. వ్యక్తిగత రాశుల వారు ఇట్టి గ్రహణాలకు అనగా 05.06.2020 మరియు 04/05.07.2020 నాడు సంభవించు ‘ఛాయాబింబ చన్ద్ర గ్రహణాల’ కు ఏవిధమైన గ్రహణ శాన్తి చేసుకోవాల్సిన అవసరం లేదు.
యద్యేకస్మిన్ మాసే గ్రహణం రవిసోమాయోస్తదా క్షితిపాః ।
స్వబలక్షోభైః సజ్ఞక్ష్యమాయాన్త్యత్తిశస్రకోపశ్చ ।। (బృహత్సంహిత ౫-౨౬)
ఒకవేళ సూర్య మరియు చన్ద్ర గ్రహణములు ఒకే నెలలో గాని లేదా నెల రోజులలో గాని సంభవించిన ఎడల పాలకులకు నష్టము వాటిల్లుతుంది. ఇట్టి గ్రహణములు వారి నాశనమునకు కారణము కాగలవు. వారి సైన్యం తిరుగుబాటు చేయుట వలన వారు నశించి పోవుదురు. భయంకరమైన రక్తపాతము సంభవిస్తుంది.
(ఇట్టి యోగము పాలకులకు ప్రతికూల ఫలాలను సూచించు చున్నది. ప్రధానంగా మిలిటరీ పెత్తనం గల దేశాలలో చిక్కులు అధికంగా ఉంటాయి. ఇట్టి దేశాలలో మిలిటరీ తిరుగుబాటు జరుగు అవకాశం ఉన్నది)
చంద్రార్కయోరేకమాసే గ్రహణం న ప్రశస్త్యతే ।
పరస్పరం వాదం కుర్యుః స్వబలక్షుభితా నృపాః ।। (కశ్యప సంహిత)
అనగా సూర్య మరియు చన్ద్ర గ్రహణాలు ఒకే మాసములో సంభవించడం ప్రశస్త్యము కాదు. వారి స్వంత సైన్యం తిరుగుబాటు వలన మరియు పరస్పరం సంహరించుకొనుట వలన నశించి పోవుదురు.
(పాలకులకు మరియు వారి సైన్యానికి మధ్య విభేదాలు పెరుగు అవకాశాలు ఉన్నాయి. పాలకులు పరస్పరం కలహించుకుంటూ ఉంటారు. పరస్పర దూషణలు తారాస్థాయిలో ఉంటాయి)
కారూకశూద్రమ్లేచ్ఛాన్ ఖతృతీయాంశే సమన్త్రిజనాన్ । (బృహత్సంహిత ౫-౨౯)
దివ తృతీయాంశ భాగమున గ్రహణము సంభవించిన ఎడల చేతివృత్తులు చేసుకోను వారికి, కళాకారులకు, మ్లేచ్ఛులకు మరియు మంత్రులకు కీడు, బాధ మరియు దుఃఖము సంభవిస్తుంది.
(చేతివృత్తులు చేసుకోను వారు, కళాకారులకు ఈ సంవత్సరంలో ప్రతికూల ఫలాలను సూచించు చున్నది. వారికీ చిక్కులు అధికంగా ఉంటాయి. అనుకున్నంతగా ఆదరణ లభించదు. నిరాదరణకు గురియగు అవకాశము ఉంది)
మధ్యాహ్నే నరపతిమధ్యదేశహా శోభనశ్చ ధాన్యార్ఘః ।
తృణభుగమాత్యాన్తః పురవైశ్యఘ్నః పజ్ఞ్చమే ఖాంశే ।। (బృహత్సంహిత ౫-౩౦)
ఒకవేళ గ్రహణము మధ్య దినము లేదా చతుర్థ ఖాంశ భాగమున సంభవించిన ఎడల మధ్య దేశపు రాజులు నశించుదురు, వారికి కీడు సంభవించును. మొక్కజొన్న పంటకు ధరలు తక్కువగా ఉంటాయి. గ్రహణము పంచమ ఖాంశ భాగమున సంభవించిన ఎడల చతుష్పాదులు (పశువులు), మంత్రులు, అంతఃపురం లో గల స్త్రీలు మరియు వైశ్యులకు నష్టము వాటిల్లును.
(మధ్య దేశంలో ఇప్పటికే రాజకీయ స్థితిగతులు విపరీతంగా ఉన్నాయి. మధ్య దేశంలో గల రాష్ట్రాలయందు ఇట్టి చిక్కులు ఇంకనూ అధికమగు సూచనలున్నాయి. తత్సంబంధిత పాలకులకు చిక్కులు తప్పవు. మంత్రి పదవులందున్న వారికి ఈ సంవత్సరం అగ్నిపరీక్ష వలే ఉంటుంది. ఒకవైపు రాజు మరొక వైపు ప్రజల మెప్పు పొందుటకు వారు అహర్నిశలు శ్రమించ వలసి ఉంటుంది. వ్యాపారులకు ప్రతికూల ఫలాలు అధికంగా ఉంటాయి)
మిథునే ప్రవరాజ్ఞ్గనా నృపా నృపమాత్రా బలినః కలావిదః ।
యమునాతటజాః సబాహ్లికా మత్స్యాః సుహ్నజనైః సమన్వితాః ।। (బృహత్సంహిత ౫-౩౭)
మిథున రాశిలో గ్రహణము సంభవించిన ఎడల ఉన్నత స్థానములందు గల స్త్రీలు, ఉత్తమజాతి స్త్రీలు, రాజులు మరియు వారికి సమానమైన వారు, కళ లందు నిష్ణాతులైన వారు, యమునా నది తీర ప్రాంతము లందు నివసించు వారు, బాల్ఖ, విరాట మరియు సుహ్మ ప్రాంతవాసులు – వీరందరూ కూడా కష్టాలను ఎదుర్కొందురు.
గ్రాసనామితి యదా త్ర్యంశః పాదో వా గృహ్యతేఽథవాఽప్యర్ద్దమ్ ।
స్ఫీతనృపవిత్తహానిః పీడా చ స్ఫీతదేశానామ్ ।। (బృహత్సంహిత ౫-౪౬)
ఒకవేళ, బింబము యొక్క తృతీయ లేదా చతుర్థ భాగము లేదా అర్ధ భాగము గ్రహణ ఛాయా తో కనిపించకుండా పోయిన ఎడల, ఇట్టి గ్రహణమును ‘గ్రాసన’గ్రహణం అని అంటారు. ఇట్టి గ్రహణ ప్రభావము వలన చక్కగా వృద్ధి చెందుతున్న రాజులు మరియు రాజ్యాలకు కీడు వాటిల్లుతుంది. ధన సంపత్తి నశించి పోతుంది. వృద్ధి చెందుతున్న దేశాలు, వృద్ధి చెందాలనే అభిలాష గల దేశాలయందు క్షామము, కరువు కాటకాలు సంభవిస్తాయి.
స్వస్తి ప్రజాభ్యః పరిపాలయంతాం -
న్యాయేన మార్గేణ మహీం మహీశాః ।
గో బ్రాహ్మణేభ్య శ్శుభమస్తు నిత్యం -
లోకాస్సమస్తా స్సుఖినోభవంతు. ।।
"स्वस्ति प्रजाभ्यः परिपालयन्तां - न्यायेन मार्गेण महीं महीशाः ।
गोब्राह्मणेभ्यः श्षुभमस्तु नित्यं - लोकाः समस्ता सुखिनो भवन्तु" ।।
నమిలికొండ విశ్వేశ్వర శర్మ, సిద్ధాంతి
नमिलिकोण्ड विश्वेश्वर शर्म, सिद्धान्ति
Penumbral Lunar Eclipse
Penumbral Lunar Eclipse 10.01.2020
Penumbral Lunar Eclipse
ఛాయా బింబ చన్ద్ర గ్రహణం
10.01.2020 నాడు సంభవించ నున్న ఛాయా బింబ చన్ద్ర గ్రహణం పరిగణనలోకి వస్తుందా? అసలు ఛాయా చన్ద్ర గ్రహణం అంటే ఏమిటి?
ఇవి చన్ద్ర గ్రహణము ను సూచించు చిత్రములు. అసలు చన్ద్ర గ్రహణం ఎలా ఏర్పడుతుంది? సూర్యుడికి మరియు చంద్రుడికి మధ్య భూమి వచ్చినపుడు భూమి యొక్క ఛాయ చంద్రుడి పైన పడడం వలన చన్ద్రుడు స్వల్ప కాలం కొరకు కనుమరుగౌతాడు. మనం ఏదేని ఒక వస్తువును చూడాలంటే ఆ వస్తువు పై పడిన సూర్య కిరణాలు లేదా వెలుతురు వక్రించి మన కంటిని చేరినపుడే మనం ఆ వస్తువును చూడగలము. గ్రహణ సమయంలో సూర్య రశ్మి చంద్రుడిపై పడక పోవుట వలన చన్ద్రుడు మన కంటికి కనిపించదు. అదే విధంగా సూర్య గ్రహణం కూడాను. గ్రహణ సమయంలో సూర్యుడు మరియు భూమికి మధ్య చన్ద్రుడు వచ్చినపుడు సూర్య గ్రహణం ఏర్పడుతుంది. గ్రహణం మూడు విధాలుగా సంభవిస్తుంది.
1. సంపూర్ణ చన్ద్ర గ్రహణం
2. పాక్షిక చన్ద్ర గ్రహణం
3. ఛాయా చన్ద్ర గ్రహణం
అదే విధంగా పై ఛాయా చిత్రంలో గల పదాల గూర్చి తెలుసుకుందాము. రెండవ ఛాయా చిత్రంలో Umbra అని ఒక నల్లని నీడ కనిపిస్తుంది. ఇది భూమి యొక్క నల్లని నీడ. ఇట్టి నీడలో పూర్తిగా కప్పబడి యున్న చన్ద్రుడు వలన సంపూర్ణ చన్ద్ర గ్రహణం ఏర్పడుతుంది. Umbra – నల్లని నీడకు పైన క్రింద మరొక నీడ గల ప్రాంతం కనిపిస్తుంది. దీన్నే Penumbra – నీడ యొక్క ఛాయ అంటారు. ఇది మనం నిత్య జీవితంలో కూడా గమనించ వచ్చు. ఏదేని ఒక వస్తువు యొక్క నల్లని నీడకు పైన క్రింద దాని ఛాయ కనిపిస్తుంది. అదే విధంగా గ్రహణ సమయంలో కూడా నల్లని నీడకు ఇరువైపులా కొంత ఛాయ కనిపిస్తుంది. చన్ద్ర గ్రహణం విషయంలో, చంద్రుడు ఇట్టి ఛాయ Penumbra లో కొంత భాగం మరియు Umbra నల్లని నీడలో కొంత భాగం ఉన్న ఎడల అది పాక్షిక చన్ద్ర గ్రహణం అవుతుంది. చన్ద్రుడు సంపూర్ణంగా Penumbra ఛాయా లోనే ఉంటే దానిని Penumbral Lunar Eclipse ఛాయా చన్ద్ర గ్రహణం అని అంటారు. ఇట్టి గ్రహణం ఒక పొగ గల ప్రాంతంలో చన్ద్రుడు ఉన్నట్లుగా కనిపిస్తుంది.
ఇట్టి గ్రహణమే 10.01.2020 నాడు సంభవించు ఛాయా బింబ చన్ద్ర గ్రహణం. ఇది భారత కాలమానం ప్రకారం 10.01.2020 రాత్రి 10:37 నుండి 11.01.2020 నాడు ఉదయాత్పూర్వం 02:42 వరకు ఉంటుంది. దీన్ని ప్రతి ఒక్కరూ కూడా చూడవచ్చు. ఎలాంటి నిర్బంధం లేదు. ఇట్టి ఛాయా చన్ద్ర గ్రహణాలు తరచు వస్తూ ఉంటాయి. ఇవి ప్రతి సంవత్సరం కూడా కనిపిస్తూనే ఉంటాయి. ఇట్టి ఛాయా చన్ద్ర గ్రహణాలకు జ్యోతిష సిద్ధాంతాలను అనుసరించి ఏవిధమైన ప్రాధాన్యత లేదు మరియు ఇట్టి గ్రహణ పట్టింపు కూడా లేదు. కావున తెలిసీ తెలియని, మిడిమిడి జ్ఞానం గల వారి మాటలు నమ్మి ఇట్టి గ్రహణానికి అనవసర ప్రాధాన్యతను ఇవ్వ వలసిన అవసరం కూడా లేదు. గర్భిణీ స్త్రీలకూ కూడా ఏ విధమైన నిషేధాలు, నిర్బంధాలు లేవు. వారు సామాన్య జీవనాన్ని గడప వచ్చును.
స్వస్తి ప్రజాభ్యః పరిపాలయంతాం - న్యాయేన మార్గేణ మహీం మహీశాః ।
గో బ్రాహ్మణేభ్య శ్శుభమస్తు నిత్యం - లోకాస్సమస్తా స్సుఖినోభవంతు. ।।
"स्वस्ति प्रजाभ्यः परिपालयन्तां - न्यायेन मार्गेण महीं महीशाः ।
गोब्राह्मणेभ्यः श्षुभमस्तु नित्यं - लोकाः समस्ता सुखिनो भवन्तु" ।।
నమిలికొండ విశ్వేశ్వర శర్మ, సిద్ధాంతి
नमिलिकोण्ड विश्वेश्वर शर्म, सिद्धान्ति
